8 Sep 2005
Ryan撐街牌：Ryan踩板撐街牌至冧XLFingerTee （蘋果日報）
講起許懷欣（Ryan），好多人會即刻諗起佢老竇許冠傑，諗起佢喺歌神演唱會Jam過吓歌，諗起佢喺美國讀書長大，其他嘢？唔多知喎！查實佢唱歌踩板一樣掂，所以佢上年開始同doublepark搭上，今日佢唔講音樂，反而大談踩板同Streetfashion，重話近排最冧Fingercroxx同X-Largecrossover既XLFingertee喎。
第一式 Frontside180°railslide
 圖：保持到平衡，就連人帶滑板跣，犀飛利呀！
 圖：落鐵杆嗰吓都好難掌握，一個唔小心隨時跌個四腳朝天。
 圖：呢招最考平衡力，原地上鐵杆嗰下已經好難。
第二式 KickFlip
Ryan話呢招係佢既強項，喺美國踩板比賽間場的Demo示範都係做呢招，你話點可以唔叫佢同我哋表演一吓呢？踩上高台凌空將塊板360°轉再踩番塊板落地，無失手，勁！
 
第三式 FrontsideOllie
連人帶板滑上高台，跳高凌空連人帶板轉向，原路飛上原路飛落，動作乾淨利落，Ryan話呢個係簡單花式，不過小記連企定喺塊板都未識，同我講都無用，可惜！
 
踩板篇
第一次「踩」李小龍
初頭以為Ryan呢個番書仔之所以鍾意踩板，九成係因為受外國文化感染，點知原來佢第一次踩板係喺香港，重要係自己畀錢買滑板自學，認真估佢唔到。老竇係歌神，做仔既熱愛音樂好自然，但就好似唔多聽過阿歌神識踩板喎？Ryan笑笑口話：「Daddy廿幾歲嗰陣都有踩過滑板架，（真？）不過就喺電影《最佳拍檔》入面（各位有興趣不妨翻睇啦）……十幾歲嗰陣我住世界花園，喺屋企出面見到有啲大過我幾年既後生仔攞住塊滑板Skate，於是我就去玩具反斗城買塊李小龍板（小記都想睇吓BruceLee滑板係點）返屋企，第一次學人踩板梗係差喇，人哋見我玩得差咪教我囉。」Ryan笑言喺世界花園學踩板一流，地方夠大任跌唔嬲。
美國做花式Demo
中四，Ryan開始去美國留學，佢完全受晒外國文化影響，聽好多外國音樂之餘，亦花好多時間踩板學玩花式。雖然Ryan未曾喺外國參加過任何踩板比賽，但佢就話試過公開表演花式：「其實都唔算表演咩花式既，只不過係喺美國啲踩板比賽中場休息時間做吓花式Demo，都叫做參與過比賽咁啦。」
香港蒲點：美孚&柴灣
Ryan戚起堂眉繼續話：「2001年咁上下喇，唔知點解無端端停咗無玩，呢兩年返香港先開始同朋友玩番，啱啱玩番既時候啲個人動作真係硬晒、技術真係生疏晒。」Ryan話踩板係好好的減壓方法，所以有時間既話一個禮拜都會去Skate兩至三次，不過最近忙於出碟既佢，要抽時間真係談何容易，一個月分分鐘只係同Friend玩到一次。佢同班Friend多數蒲美孚同柴灣踩板場，各位板友同Fans，有心想搵Ryan較量既話要知碇喇。
Fashion篇
搭上本地doublepark
 圖：Ryan本身係板仔，撐街牌Tee好理所當然
一講踩板，話題好自然離唔開街牌Tee，doublepark可以話係香港最多街牌賣的地方，Ryan能夠搭上佢，以後唔怕無Tee著。「doublepark其中一個Buyer係我好朋友，我吔無論喺衣著同Lifestyle都好似，我哋都係板友，有次講開doublepark代理既Tee，佢問我覺得點，我話幾好，喺美國都係買呢啲牌子，可能就係咁促成咗佢哋喺上年開始Sponsor我啦。」
「可能因為我喺美國做Grahphicdesigner的關係，我覺得Tee上每個Print都係Graphicdesigner既創作心血，所以我對Streetfashion特別情有獨鍾。」雖然Ryan唔係做Tee既Design，但佢一有機會就會Design自己的衣著，講到最欣賞的Artist，佢最欣賞Kaws，而EricSo同MichealLau就係佢最欣賞的本地Artist。
 後記：小記遲到Ryan無詐型！
Ryan的耐性好到加零一，訪問當日天氣極度炎熱，小記又因為唔係好識路而遲到少少（藉口！），碰面後Ryan無詐型不特止，重全程笑笑口，認真唔好意思！除此之外，為咗影到更好的踩板效果，Ryan又唔嫌麻煩一個又一個花式重複做好幾次，正式玩花式之前重熱晒身，Ryan你好好人呀。
|