23 Aug 2006

許懷欣父子決裂 （東touch #586）

許懷欣(Ryan)同許冠傑父子決裂？ 係，無錯，而且係事先張揚。自從Ryan上年入行以來，都被加上「歌神之子」既包袱，做每一件事，付出每一分努力，都被指為爸爸既庇蔭。RYAN無介意，亦無埋怨，不過始終想做出自己既風格。今個月佢推出第一張大碟，走既係Hardcore Rock路線，會幾heavy， 同阿爸既style完全唔同。於是呢兩父子，感情依舊，但音樂路上就要始分道揚鑣。

注重旋律

今次Ryan既唱片會完全依照自己口味，走非主流搖滾路線，希望可以俾香港人聽一D新野。「我細個鍾意聽oldies， high school時鍾意聽rock，我自己既音樂走在兩者之間，rock之餘會比較注重旋律。至於歌詞，一開始就要填廣東話歌詞真係幾難，所以最終是由我作英文詞，爸爸同Wyman幫我轉成中文。」新碟《開竅》，有4首廣東歌，2首英文歌，製作過程令佢有感而發。「香港人做音樂好勤力、好專心，美國人做音樂好隨意，鍾意就寫兩句，各有各好啦！」

阿爸不是 EASON CHAN

有個咁出名既爸爸，對Ryan是好是壞？「好多人會將我同爸爸比較，其實我地都係singer-songwriter，不過style好唔同。佢係一個legend，不過佢唔係Eason Chan唱得咁好個種囉。細個跟佢去見好多行內人，學到唔少待人接物既方法，而家可以學以致用。老實講，係有壓力，所以我要更力努力，希望有一日情況會反轉，D人見到爸爸會諗：『佢咪係許懷欣個老竇！』咪就掂囉。」講到尾，Ryan而家需要既係identity。