16 Nov 2006

許懷欣 X 車車 去玩、去癲、 o黎花園街 (蘋果日報)

* 車車同 Ryano係花園街去到邊玩到邊，見到 D 新奇野鬼咁興奮。見到 D 卡通公仔衫款款新，車車立刻揀左件超人款話o岩晒 Ryan ，你睇 Ryan 個表情就知佢有幾鍾意啦！（又係搞搞震冇幫襯！）

DJ 因工作關係經常同明星接觸，見多幾次面夾得來的話好多時就成為朋友，新城娛樂台 DJ 車車，同突然換左造型似足丁蟹既許懷欣（ Ryan ）就係一個好例子。約兩個大細路行孖必，就話行街唔一定要買 野 ，有得意野玩、有新奇野睇先係行街最大o既樂趣。今日一於走落出名平o野多、夠地道o既花園街逛一逛，不出所料，影相期間果然行到邊停到邊，見野就搞、見動物就摸，開心程度絕對媲美去海洋公園！

* Ryan 同車車拎住兩個聖誕波波飾物遮住對眼扮鬼扮馬，又真係幾搞笑！

「丁蟹」大鬧花園街

* 花園街生果又平又新鮮。見到果檔 D 生果又大又靚，兩個又搞一餐，正宗「混吉」。點知俾阿姐即刻話「唔買唔好搞嘛！」

* 有位靚太一見 Ryan 就大叫：「我認得佢，佢係許冠傑個仔嘛！」仲主動走去同 Ryan 打招呼。 靚太話：「影相？得咩？」 Ryan 咁 Nice ，梗得啦！

* 估不到，走 RockStar 路線 o 既 Ryan 竟然係 Keroro 一級 Fans ，見到 Keroro 電話繩立即停低再玩。

去譚才記摷聖誕飾物

許懷欣（ Ryan ）同車車雖然老友鬼鬼，但就從未試過一齊行街，今次選擇行花園街只因為所賣貨品夠地道、種類又多，夠晒平民化。 o 係 花園街，首站當然必去有 20 幾年歷史既夜冷名店譚才記。譚才記所賣既係香港工廠出口美國既雜貨貨辦，所以全部都係一件起兩件止，款式市面少見，不少潮人都喜歡恍如尋寶般搜括心愛擺設。每段時間所賣既雜貨都有少少不同， Ryan 同車車就話年尾時間最好買定聖誕飾物布置屋企，一定夠晒平！

* 「媽咪都有插花，都有搜集好多不同款式既花樽，呢個花樽都好o岩佢！」

* 11 月中喇，你又買 左 聖誕飾物布置屋企未呢？來夜冷舖買就夠平又經濟啦！

蛇王 Ryan 必上城市森林

影相過程之中， Ryan 講得最多係「我要去睇蛇！」原來 Ryan 美國讀書時期做過 5 年「蛇老竇」，返香港之後都冇機會再養番，所以經常都上城市森林睇下止癮，仲話依家儲緊錢，有機會一定養番條。加上俾佢知道車車原來驚蛇，佢就顯得更加興奮，立即跳過隔籬街睇睇有乜新貨返。城市森林係太子區賣蛇蟲鼠蟻o既專家，老闆邵生o係美國讀書時期已經係養蛇發燒友，佢更早於 84 年開始將呢種另類寵物玩意引入香港，不過一講佢就慨歎：「可惜中國人思想始終較保守，日本人養蛇較遲起步，卻比我地發展得更快。」

* Ryan 可謂係撚蛇高手，條條蛇拿上手玩一餐鬼咁興奮，呢條白化非洲球蟒o係香港十分少有，所以價值不菲到要 6 位數字先有交易。

* Ryan 由踏入店舖一刻開始就不停同老闆邵生密密傾偈，完全漠視車車 o 既 存在，嚇到車車行近兩步都唔願。

行行下見到寵物檔， Ryan 就即刻大叫正想買間貓屋畀家中愛貓 Kingsley ，仲話依家出 D 寵物用品款式愈 來 愈多，買間屋畀 Kingsley 都搞到好鬼頭痛，好彩花園街寵物檔賣既貨色比起一般寵物店平好多。依家養寵物既人多左，賣既寵物用品款式又多左 ，照計生意應該比以前好好多。不過店主任生卻大唱反調：「舖頭多左 ，加上依家D天氣都唔識凍，我入左好多新款既狗衫仔，反應都麻麻，生意愈來愈難做，淨係夠搵兩餐咋！」

津味辣魚蛋點都要食

o係香港土生土長o既香港人都應該有行過花園街（記者讀書時期都留下不少腳毛），最開心 既 係行兩行就可以隨街篤街邊小食。以往豐盛時期，近弼街賣小食既人直情逼爆十字路口，不過近年變化不少，唔少相熟小食舖已經失去影蹤，唯一只有津味雲吞面既辣魚蛋屹立不倒。津味門口小檔雖然獨沽一味賣魚蛋，但出晒名夠晒辣，門口永遠都有人排長龍。 Ryan 同車車都係貪吃之人，雖然兩個都怕辣，但都忍唔住要食番串。